Corey

零、唔好去

話說我用十二日(連出入營兩日),去咗S. N. Goenka嘅內觀打坐(Vipassana)十日營。如果有時光機返去同報名前嘅自己講,我會叫佢唔好去。

一、十日課程

一連十日,每朝四點起身,每日打坐共九個半鐘,每晚聽S. N. Goenka錄影/錄音佛法開示。第零日入營上繳電話及電子儀器、銀包及錢、書本及紙筆、食物及非處方藥物等等,第十一日清潔後出營。頭九日同學之間唔可以講嘢。

中心環境清幽,三餐照顧周到。因為冇電話、冇書,小休除咗沖涼、洗衫,就係補眠,到後來已經瞓到瞓唔著。頭兩日坐到腰酸背痛,後來就慣。事前我上網搵評價,見到嘅都係咁上下。但大佬呀,我明明覺得哩啲根本唔係重點。

課程的確有佢有用嘅地方。打坐近百小時,係高強度專注力訓練。每晚講嘅人生道理,係認知行為治療。沒收電話、零食過十日,係戒癮治療。我仲順便改埋寒背,練習咗早睡早起添。

二、科學你個頭

哩個課程聲稱自己無宗教,而只係教授佛陀發明嘅打坐方法,就係咁樣呃咗我入去。

喺佛法開示環節,Goenka多次強調佢哋唔係宗教,係科學,並毫不保留咁嘲弄「全知全能嘅神」以及各種宗教儀式。同時間,佢成個課程係建基於前世今生、種善因得善果咁上下嘅概念。

而且所有道理,唔係用大量比喻同寓言故事解說,就係「因為哩個係自然嘅法則」。總之都係啲不能證偽嘅講法。

三、新興(唔係)宗教

出營後我同朋友傾訴,期間我學習咗New Age,係由七、八十年代興起嘅一堆新宗教信仰,借用傳統宗教元素創成,但部份唔會承認係宗教,而只係關注身心靈、能量、宇宙、萬物有靈、水晶、塔羅牌……咁喎。

而十日營同學就鍾意講:「我唔係信呀,不過係真㗎嘛。」「我唔係說服你呀,不過係真㗎嘛。」(簡直係無敵!成為咗我近排嘅口頭禪~)

課程聲稱唔係宗教,亦冇儀式。所以每次打坐頭尾播放嘅巴利文唱誦,只係老師真誠嘅祝福,唔係儀式咁話喎。甚至第一日已經有個「唔係儀式」,只係請大家跟佢講:「我皈依佛。我皈依法。」又因為「唔係宗教」嘛,佢嘅解釋係皈依the quality of enlightenment、the law of nature。

回想起嚟,硬係覺得邪邪哋,但又明明冇見到對身心有害嘅邪嘢。我覺得陣邪味係來自佢哋用一啲好粗疏定義嘅語言令你放下戒心。例如佢哋話哩個唔係宗教,唔係信;如果採用佢哋嘅用字,咁我連講「我唔信」嘅機會都冇。唔邪嘅,例如傳統基督徒起碼擺明車馬傳教,識得分咩叫信、咩叫唔信。

又,其中一個白紙黑字嘅規矩係即使同性學員都唔可以有任何身體接觸,佢冇講點解,但我有上網睇過係因為佢哋相信身體接觸會有能量轉移,掂到就會偷咗啲大師嘅能量。即使哩十日唔算邪,我總係覺得可以邪落去嘅潛能好大……

四、傳教技倆

課程嘅操弄心理嘅技巧係高超嘅,你睇我坐足十日就知啦。首先,佢講嘅技巧/道理,係要靠感受,感受過先會明。點先感受到呢?當然係跟佢打坐。打坐咗都未感受到?操弄技倆係……益友話好似啲美容院推銷療程咁──

頭一兩次,就話啱啱開始未見成效,但底層開始緊㗎喇;到中間,嗱係咪睇到有少少少少成效呢;最尾唔得,就話我講過咁多項條件你有冇做齊先,有冇唔小心漏咗先?最尾都冇效咩,買多個療程就有效㗎喇!

課程話,內觀打坐會有某種感覺,但千祈唔可以貪愛(crave),貪愛就感受唔到。亦千祈唔好自我暗示,而只係感受身體嘅實相。

正如如果我叫你唔好想像一隻粉紅色大笨象,你即刻會做嘅就係想像一隻粉紅色大笨象。由佢叫唔好自我暗示一刻開始,同學們好自然做嘅就係自我暗示。而自我暗示唔成功嘅同學呢,一定係因為貪愛喇。

哦你仲有貪嗔,而且前世嘅貪嗔都入埋你數,即係類似原罪嘅概念。到第十日,就提醒大家,記住每年返嚟一次。正如美容院都會踩到你塊面一文不值,然後又推銷下個療程咁。

五、借舊立新

而借用舊有宗教元素去傳新宗教,更係非常成功咁呃到我哩個無知中女。我就係因為(自以為)對佛教有興趣而入去嘅,點知佢掛羊頭賣狗肉。

課程聲稱佛陀嘅教導早喺發源地印度失傳,只喺緬甸苟且保存下來。又稱佛陀曾經預言,2500年後佛法會再度傳入印度。而2500年後,就咁啱係Goenka開始拜師學法嗰年喎。

嬲嘅位係,其實我已經分唔到佢邊句真邊句假。究竟有邊啲先係原始佛教公認嘅?而我就估計,佛陀應該冇講過打坐會發出「慈心嘅振動、愛與慈悲嘅電流」。哩句係第十日先講嘅,明明由講佛陀教導,一步一步講講吓變到愛與慈悲嘅電流,嗯……

六、人類學田野研究

第十日終於可以同同學傾偈,都係我哩十二日嘅其中一個得著 — — 擴闊咗我對人類嘅認知。

「我唔係信前世呀,不過係真㗎嘛。有啲嘢你解釋唔到㗎喎,但一定有原因㗎嘛,咪係前世囉。唔使咁抗拒,你要接受有啲嘢係解釋唔到嘅。」而佢又解釋到。

「唔係宗教呀,都冇燒香。」同一個人又話,「科學咪又話係宗教,你個宗教個名叫科學啫嘛。」
乜科學有燒香咩?!

正如課程不停強調,感受過就會明白係真嘅,有同學都無比相信感知即真實,連發夢都係真嘅。有同學話,佢入營發咗七晚惡夢,睇咗自己嘅七世。

傾吓傾吓,我簡直覺得個課程冇問題,唯一問題係我唔應該出現。何止前世,有同學聽到我竟然信人類由猿類演化而來,佢就好高興咁問我信唔信外星人,並表示佢認為人類係外星人放落地球嘅。

「我有個朋友有頭痛,一直醫唔好,直至搵咗個教meditation嘅大師幫佢睇過,原來佢前世係日軍,斬過好多人頭,所以會頭痛,之後先好翻。(點解殺好多人, meditate就好得翻咁便宜?)唔便宜㗎,做咗好幾次,每次幾小時先好翻。而且佢本身都做咗好多好事,先遇到哩個大師㗎嘛。」
其實我都明點解信新宗教嘅,因為抵囉。「吸引力法則」都係哩類嘢,以自定方法祈求保佑,反正唔使奉獻裝香,不信白不信呀。

嗱其實我好接受各人有不同宗教信仰,但佢哋令我最忟憎嘅位係,佢哋一來唔承認係宗教,二來係將現實同宗教撈埋嚟講。
「你唔信人係由粒子組成咩?(信呀, atoms吖嘛。)係囉,每人嘅粒子會發出唔同嘅震動,咪會吸引翻相同震動嘅人同事囉,係真㗎喎。」
令我記起聽過一位翻譯系博士嘅講座,言之鑿鑿咁話翻譯嘅起源係巴別塔。上網搵吓佢背景,原來果然係啲咩咩身心靈貢獻宇宙能量系嘅,係好典型嘅New Age嘢嚟。多謝哩個營嘅同學們開咗我對眼。

有預計話,到2035年,全球無神論者/無宗教人士會多過宗教信徒。但原來前者會包含咁多信輪迴外星人水晶塔羅牌宇宙能量嘅人,嗯,衝擊咗我對世界一廂情願嘅美好想像添。

七、回歸虔誠無神論

另一得著係好粗略咁學習咗佛教嘅起源,發現佛陀同耶穌原來幾似。耶穌當年嫌猶太教太著重律法所以自立門戶,然後基督新教又嫌天主教太著重儀式,佛陀都係嫌古印度滿天神鬼太多祭典所以開創佛教。總之大家都覺得其他人迷信,自己嗰套先係真理。

我原本好鍾意佛教講無常,唔會寄托喺未知嘅永恆。但其實涅磐即係永恆離苦,咪即係佛教版天堂。哩十日我對佛教有翻正確認知,篤爆晒之前啲浪漫泡泡。

正如益友話齋,我都唔信輪迴,就唔好話鍾意佛教啦,話自己鍾意梅村(唱小清新嘅英文入世佛寺)好喇。對於世界嘅解讀,演化論已經令我好信服;宗教嚟講,睇完《神的演化》都算滿足咗我嘅好奇心;連喺所謂心靈層面,都遇上咗梅村。而且好感恩,我喺塵世間已經得到足夠嘅愛同滿足(我全家都好幸福喎!),唔需要喺啲典籍度尋求喇。

有學者稱,佛教同現代心理學好吻合,所以佛教係真嘅。聽多咗諗多咗,我發現的確有部份吻合。但其實,只要無視唔吻合嘅部份,剩翻嘅部份咪吻合囉。計我話,反正吻合,咁我學現代心理學就得,唔使學佛喇。

八、我對冥想嘅理解

話說我有興趣入營,係因為我幾鍾意靜坐冥想。喺不同途徑我都間接或直接聽見過,哩個課程係最正宗嘅冥想。入到去聽書,先發現係失傳得嚟又苟且保存,然後神奇地應驗預言再次發揚光大嗰種……嗯……正宗。

喺打坐環節,目測我嘅認真程度大概排全班中間。我第七日先考慮好唔好退出,頭六日除咗不能自制咁恰著之外,我都係好認真冥想嘅。

心理學有個狀態,叫做flow(心流/神馳/沉浸),指完全專注時嘅心智振奮,甚至欣喜若狂。有心理學家話flow係最佳體驗,因為人從中感到極高嘅滿足。當入到狀態時,冥想最癲嘅係,甚至冇一件實事去消耗專注,而係好純粹咁享受flow。而且嗰一陣心境澄明,甚至會幫到日常生活都平靜咗、專注咗。

哩個課程係教人透過冥想,感受一種平時覺察唔到嘅觸感 — — 全身舒暢嘅微小振動,從而得知人不過係不斷生滅嘅次原子粒子,因此明白無常,然後唔再貪愛或嗔恨就會得到永恆解脫。

我應該算係感受唔到,但我平日冥想都偶爾有睇到一啲景象,我理解為因感覺剝奪(sensory deprivation)而產生嘅幻覺。就好似所謂「俾鬼砸」咁,當身體機能部份清醒、部份瞓著,就會經歷有別於全醒或全瞓嘅感受。

根據我嘅信仰(現代科學),「俾鬼砸」即係控制肌肉活動嘅機能熄咗,但感受肌肉活動嘅機能清醒,於是感受到自己郁唔到。唔同冥想方法有唔同技巧令人保持專注清醒,但長期合眼唔郁,身體就會作啲幻象或幻覺出嚟。不過哩啲只係副作用,一般嚟講冥想並唔係追求哩啲感受嘅。

九、假如你想去

假如有人睇到哩度竟然仲想去,疫情期間去係唔錯嘅。參與人數上限為場所可容納人數一半,即係每人可以獨霸兩張床,一張瞓一張擺行李,仲有獨立廁浴添。

課前唔收學費,課後如果你感受到佛法又好想更多人認識佛法,歡迎捐錢。而根據課程內容,要儲十項美德先會得到涅槃(佛教版天堂),其中一項美德叫布施,而當中「法的布施」係最高嘅布施,幫其他人認識佛法,即係捐錢或者返嚟做義工。

係我幸運,先接觸到認知行為治療、世俗版靜觀冥想。如果你冇我咁幸運,或者你會喺十日課程好有得著呢。而且口碑嚟講,我啲同學絕大部份都好高興㗎,得我一個咁奇怪咁堅持可證偽嘅先叫科學咋嘛。學同學們都齋,「都係導人向善啫。」

但對我嚟講,過羊頭賣狗肉真係不能接受,咁樣當初嘅consent都係假consent。我簡直覺得叫人落地獄嗰個隱形飛天男人都可愛過佢哋!(一篇文同時得罪晒新舊宗教信徒LOL)

--

--

《直男愛出櫃:簡直地獄!我的一年反恐同任務》(The Cross in the Closet: One Man’s Abominable Quest to Find Jesus in the Margins),Timothy Kurek,2012
★★★☆☆

主角喺聖經帶(美國保守基督徒根據地)長大,從小篤信。有日朋友哭訴自己出櫃後遭趕出家門,主角努力克制心中嘅法利賽人(死守律法嘅代表),先忍得住冇向眼前淚人引用經文抨擊同性戀。佢冇落井下石,但都冇半句安慰,朋友就已經喊完離席。

佢事後反省,覺得咁嘅行為好唔恰當,唔似耶穌會做嘅事。為咗了解哩個群體所受嘅一切,佢決定做一年實驗,假扮同志向教會、家人、朋友出櫃,去同志cafe打工,蒲gay bar,去佢曾經企喺對立面嘅人權組織做義工。然後佢學習到,同志都係人,群體入面有各種各樣嘅個體;受歧視好慘,隱藏一大部份嘅自己好辛苦。

作者嘅立場,都同我部份撐同基督徒朋友類近。撐同理據係從人出發,有血有肉咁接觸而被打動,尤其著眼於受逼迫嘅故事。但即使心被打動,腦中仍然要同法利賽人鬥爭。

如果反同基督徒睇呢,可能會嫌本書冇乜神學論述。只有堅信年輕地球創造論嘅美南浸信會同志教友話,「我堅信上帝比我自己更清楚我的為人,也堅信祂比我自己更愛我這個人。」另有表明希望一生做個不濫交榜樣嘅虔敬同志信徒話,「假若上帝能看清我的心,祂便知道我有多麼愛他、願一生服侍他。如果同性戀真是一種罪,那我也只需要相信當祂說祂的愛能遮掩許多的罪,他並沒有在騙人就好。」

撐同非基督徒呢,即係我,首先認識到同性戀原來(!)咁慘,另外睇佢講教會都令我有啲感受。作者早於實驗初期出櫃感受到不被接納,就離開由細返到大嘅教會。到實驗尾聲,佢決心返去一探究竟。「要走進這棟小洋樓[教會]實在是件痛苦的事。[…]我心虛地待在這裏,好像我這麼做就是在背叛我的新朋友。當我再次踏進那扇門,我就覺得自己正在寬恕所有傷害過好多、好多人的態度和信念。」

勢估唔到,牧師向佢道歉,話如果可以重回過去,即使立場唔會改變,但會用更友善嘅方式切入。久別重逢嘅教友紛紛嚟擁抱佢,甚至排咗條隊一個一個攬攬佢。離去後,佢又同腦中嘅法利賽人辯論。
法:「你忘了基督徒也是人,但你現在想起來了。」
作:「他們是人,但我永遠不會忘記他們隨口的批評,可能會讓別人痛不欲生。」
法:「凡人都會製造痛苦、互相傷害。這是無法改變的事實,叫人悲傷的事實。」

大概係為著市場在地化,中譯書名刻意遺漏,但其實原作書名嘅「十字架」、「耶穌」先係縱貫成本書嘅世界觀。如果哩本書係人類學田野研究報告,研究員本身係保守派基督徒,研究對象係身處聖經帶嘅同志。成本書嘅主旨大概係,作者深入了解後痛改前非,認為同性戀唔係問題,但最緊要都係信耶穌。信耶穌得嚟,最好仲要係信地球得幾千年歷史嘅美南浸信會,而唔係唔相信有地獄嘅普救派。大團圓結局唔係BBQ跳起yeah,而係作者向同志朋友坦誠後,朋友捉住佢為佢祈禱祝福。

我另外學習到嘅係,即使係聖經帶保守福音派虔誠藍血信徒,都會自慰、婚前性行為、離婚,提及時亦若無其事不加批判。難怪壓抑成性嘅(部份)香港教會最鍾意話外國教會墮落,潛台詞係唯有佢哋先係最正宗~

作者一年來遇上好多好人,又或者係佢識感恩所以睇得見好人。新認識嘅朋友對佢講咗一番話,我好鍾意,大言不慚咁提醒自己,亦借花敬佛送俾大家。
「我能看出你有一顆善良的心,一顆溫柔心。別被生活消磨成憤世嫉俗的人,別走上那條路。請你無論如何都要堅守這份心地,因為我看見你內心有恩慈。」

--

--

《真正的快樂處方:瑞典國民書!腦科學實證的健康生活提案》(HJÄRNSTARK: Hur motion och träning stärker din hjärna),Anders Hansen,2016
★★★☆☆

本書引咗好多研究,實證運動好處。大概每星期三次有氧運動(達最高心率70%),每次30–45分鐘,有助舒解壓力、改善注意力、增強記憶力、心情變好、令大腦回春。每星期一次運動到筋疲力盡,有助對抗焦慮。重訓有助增強某類記憶力。

--

--

《我們與(不)信的距離》,黃嘉樑,2020

多謝傳道人朋友同Catch Magazine編輯邀請我睇哩本書。哩本書為六個聖經人物平反,首先講出主流信徒對諸位人物嘅評價,然後作者根據聖經研究提出不同見解。身為不信者睇哩本信者寫嘅書,感覺信與不信果然相距好遠。

一、以掃、以撒、基甸:信與不信看聖經故事

對於以掃、以撒、基甸,我同作者嘅睇法尚算相近。但既然作者開宗明義挑戰主流論述,我近於作者,按道理即係遠於主流信眾。

作者話,老實嘅以掃明明強壯、寬容,信徒唔應該因為神唔揀選佢,就抹黑佢愚昧魯莽、輕看長子名份。係囉,點解上帝偏愛奸詐嘅雅各,但厭惡老實嘅以掃?

作者稱讚以撒,即使年幼時被綁祭壇驚見父親舉刀,或因童年陰影而性格被動、內斂,但佢起碼用情專一,唔似得其他長老咁妻妾成群。又係喎,聖人們個個妻妾成群,高呼「一男一女、一夫一妻、一生一世」嗰班何以自圓其說?

作者又提醒,唔好學似基甸,只係宣稱屬靈為搏尊重,甚或公器私用。哩點對部份教會中人嘅評價,不信者表示冇補充。

二、參孫:信與不信看宗教

參孫遭大利拉哄騙,講出力大無窮秘訣在於一把長髮。大利拉氹佢喺大脾上瞓覺,剪去佢一頭長髮,令佢失去神賜力量。

作者對參孫嘅平反幾有趣,佢話參孫爆響口並唔係因為沈迷女色。得到神賜力量嘅代價係失眠,偏偏大利拉可以令佢安睡。參孫多次提及失去力量後,佢會軟弱「像平常人一樣」,但都向大利拉講出秘密,可見佢心底都想回歸平常。

作者最後問:「我們寧願作一個『平常人』,過平常人的生活?還是甘願付上『平凡』的代價,回應上帝的呼召?」

我最近先知,原來教會中人自覺係小眾,奮力抵抗社會訕笑,苦苦堅忍跟隨耶穌,吻合作者所言。不信者如我睇見嘅反而係,教會掌管未來棟樑教育,獲得法律上多種豁免,配以強大體制及緊密人際網絡,幾乎可以話係橫行無忌㗎喇喎!

三、雅各:信與不信看牧養

聖經話,雅各「到了一個地方,因為已經日落,就在那裏過夜」。夢見耶和華後,「拿起枕在頭下的石頭,[…] 這塊石頭必作神的殿」。

作者話,「枕在頭下」係錯譯,正解係放石頭喺「頭邊」傍身,原文用字同掃羅追殺大衛時喺營中休息將槍放喺「頭邊」一樣。雅各獨自上路,入黑時身處無名地方,只有一塊石頭傍身,突顯流離嘅不安感。最終蒙得上旁保守,雅各守諾築壇奉獻。

本章其中一條思考問題:「甚麼東西能給你安全感?當你缺乏安全感的時候,你會從哪裏尋求幫助?」而正文最後一句係「尤有甚者,讓上帝成了我們手中的『石頭』,且用完即棄?」

由石頭到神殿,信者睇見嘅可能係救贖,以至後來嘅召命。不信嘅我就見到教會首先繪影繪聲放大人心不安,再以安全感作餌誘,成功捕獵後隨即開始情緒勒索。教會要奉獻,信眾要心安,各取所需理應冇壞嘅。

但每當從朋友身上睇見同教會交易嘅代價,我就感到痛心。朋友兒時家庭支援薄弱,由細到大喺教會成長。長年被灌輸人嘅不足,聽見神所愛或所惡,眼見教會界定我者同他者。哩位朋友嘅嗜好係瘋狂自我懷疑,時刻慌忙反省自己有冇做錯,有冇一點點做得唔夠好。喺佢身上我感受到,教會嘅conditional love好有毒。

四、亞伯拉罕:信與不信看經書

據稱,「信心之父」亞伯拉罕都經歷過小信嘅時候。話說當上帝應許亞伯拉罕同妻子撒拉生仔,「亞伯拉罕就臉伏於地竊笑」,心諗:我老婆90歲喇喎!而等待期間,亞伯拉罕更為咗生仔而接受撒拉安排婢女夏甲為妾。

作者為佢平反,「竊笑」係錯譯,正解係欣喜嘅笑容。而佢接受夏甲為妾時,上帝只係應許亞伯拉罕生仔,但冇講明係同撒拉生,娶妾一事合乎應許。可見,亞伯拉罕由始至終都係堅信嘅。

縱使彷似兩極,但以上同樣從信嘅角度出發。而不信嘅我喺哩個故事睇唔到咩信與不信,只係疑惑,所謂接受婢女為妾,大概即係婢女被捉入柴房「老爺~唔好呀~」咁樣?如果有基督徒聲稱感受到上帝應許,係咪可以捉屋企個賓賓印印「為妾」?

我估信徒標準答案係,當年文化同法律唔同,所以唔應該用現代眼光去理解。啱呀,我對成本《聖經》都係咁諗~

後記:Catch Magazine係一本基督徒中學生雜誌,收到邀稿時已經覺得佢哋好痴線。我老實不客氣咁落筆,佢哋竟然真係登,更覺痴線。上面嗰位我未打算拜,但狗口長不出象牙嘅我面對佢哋嘅胸襟,只能講句請受小弟一拜。

網上刊登:https://iscf.fes.org.hk/?p=7045

--

--

《背離親緣:那些與眾不同的孩子,他們的父母,以及他們尋找身分認同的故事(下)》(Far From the Tree: Parents, Children and the Search for Identity),Andrew Solomon,2012
★★★★★

作者花十年時間,深入訪問三百個「有其父不有其子」嘅家庭。中譯版分兩冊,上冊包括嘅「不有其子」有聾人、侏儒、唐氏綜合症、自閉症、思覺失調;下冊有嚴重智障、神童、因姦成孕、罪犯、跨性別。

縱然唔係冇人紀錄過哩啲界別,但好多時都係為propaganda服務嘅片面之詞。例如因姦成孕嘅故事,反對墮胎陣營就著眼於生咗小朋友然後happily ever after嘅情節,而支持墮胎嘅就描繪出悲慘嘅未婚少女。作者純純粹粹咁記低社群中、甚至個體中嘅百味陳雜,好立體,好真實,好好睇。

洋洋灑灑嘅大書以聾人社群開首,因為哩個界別嘅形成同矛盾,原來相對嚟講算係塵埃落定。同樣有較低嘅聽力,一派堅持用口語、融入社會,另一派用手語、以聾人身份自豪。

喺不同界別,都有類似嘅分野。同為侏儒,有人去做以月計嘅拉骨手術,亦有人以「小人」身份自豪。有跨性別者勢要跨到去另一性別,亦有人自在於性別流動。

受訪對象本身就過著如戲人生,遇上作者交心訪談,呈以深思文筆同舖排,哩本真係拎起咗會放唔低嘅書嚟。

--

--

《背離親緣:那些與眾不同的孩子,他們的父母,以及他們尋找身分認同的故事
(上)》(Far From the Tree: Parents, Children and the Search for Identity),Andrew Solomon,2012
★★★★★

作者花十年時間,深入訪問咗三百個「有其父不有其子」嘅家庭。中譯版分兩冊,上冊包括嘅「不有其子」有聾人、侏儒、唐氏綜合症、自閉症、思覺失調。喺每個界別,作者都採訪到該群體不同面貌,深刻獨到咁反思 illness vs identity、vertical identity vs horizontal identity。

關於扶養小眾嘅神作。九年前出版,幸得朋友推介前我冇聽過。好睇到想大嗌,咁大件事冇人講?!

學朋友話齋,睇哩本書係被震攝嘅,跟埋佢抄段正嘢先:
// My mother didn’t want me to be gay because she thought it wouldn’t be the happiest course for me, but equally, she didn’t like the image of herself as the mother of a gay son. The problem wasn’t that she wanted to control my life — although she did, like most parents, genuinely believe that her way of being happy was the best way of being happy. The problem was that she wanted to control her life, and it was her life as the mother of a homosexual that she wished to alter. Unfortunately, there was no way for her to fix her problem without involving me. //

--

--

《普魯斯特與烏賊 : 人類大腦如何演化出閱讀能力》(Proust and the Squid: The Story and Science of the Reading Brain),Maryanne Wolf,2007
★★★☆☆

本書首先講人類發明文字嘅歷史,然後講小朋友學識閱讀嘅里程,最後講讀寫障礙嘅成因及特徵。

第一部份好好睇,原來蘇格拉底反對文字,太速食文化咁話喎。其餘一般般,講讀寫嘅書,寫得唔多好讀。講科學時冇實例,但係咁加插無助理解嘅文學引文。

求其抄吓筆記~
閱讀發展:先期>初級>解碼>流暢>專家
英文閱讀障礙:音韻覺識問題、唸名速度緩慢、兩者皆有
中文閱讀障礙:音韻覺識問題、唸名速度緩慢、兩者皆有、組字規則問題、三者皆有

--

--

《No-Drama Discipline: The Whole-Brain Way to Calm the Chaos》,Daniel J. Siegel and Tina Payne Bryson,2014
★★★☆☆

考生仔牌嘅第二本教科書。比起上一本,哩本更多講背後原理,同樣多嘅係以重重複複嘅篇幅安撫為人父母者:你已經做得好好,個個湊仔都會犯錯㗎。唔只教人對小朋友要connect and redirect,作者寫書都係不停connect and redirect。

筆記:
REDIRECT
- Reduce words
- Embrace emotions
- Describe, don’t preach
- Involve your child in the discipline
- Reframe a no into a yes with conditions
- Emphasize the positive
- Creatively approach the situation
- Teach mindsight tools

--

--