《For Goodness Sex: Changing the Way We Talk to Teens About Sexuality, Values, and Health》（為了好的性：改變我們與青少年談論性、價值觀和健康的方式），Al Vernacchio，2014
★★★★☆
好耐之前嘅上回提到，我知道我哋接受嘅性教育有問題，但究竟好嘅性教育應該點教？然後我睇咗哩本教人教性教育嘅書。
零、性係美好嘅力量
作者話，美國人係性壓抑到性沉溺。性教育只教禁慾，教人唔好做咩，但冇教如何擁有快樂健康嘅性生活。哩本書就教人教仔女，愛自己嘅身體，視伴侶為一個人而唔係性玩具，基於正確資訊並符合價值觀去作出選擇。
一、教健康嘅性
作者正職係喺中學教「性與社會」，佢唔係鼓勵或禁示學生發生性行為，因為當學生清楚自己嘅價值觀後自然會決定。研究顯示，青少年係想家長同佢講性嘅。又係研究顯示，年青人平均嚟講喺十一歲就開始上鹹網；所以與其等佢自己睇，不如由家長同佢講。家長首先要認清，性係你嘅仔女嘅人生中必然又正常嘅一部份。而作者對應否發生性行為嘅規則係：如果你唔能夠望住伴侶對眼去談論性，咁就唔好同佢發生性行為。
二、共建家庭對性嘅態度
冇一個選擇係「價值中立」嘅。首先家長要諗清楚自己對性嘅取態，然後用正確名稱去談論，唔好用委婉語。家長唔一定要隆重其事咁進行性教育，平時一齊睇電視見到得閒就可以講兩句。同仔女講性，同同仔女講日常事唔需要冇分別。「執房呀。」「幾多歲都可以錫媽咪㗎。」「我愛你。」「如果你會性交，一定要用安全套。」以上句子，全部都可以用同樣方式講出嚟。而且仔女都會以同樣方式聽入耳 — — 感受到父母嘅愛，亦覺得有啲煩。面對面講唔出口？可以打個訊息俾阿仔：「Have a great day at school, and remember that consent is sexy.」亦可以喺午餐盒貼張字條：「Your body is beautiful just as it is!」
三、唔好用棒球隱喻性
美國人好興用棒球隱喻性行為，但作者覺得當中嘅觀念好錯 — — 一壘二壘三壘彷彿性行為必須有特定次序，抵壘後一方係贏家一方係輸家，教練話要比賽就要上場而球員冇自主⋯⋯
作者提議用新隱喻 — — pizza。薄餅有各種唔同嘅口味，同枱食嘅每個人都會好開心好滿足，即使同對方食過pizza都會問吓佢今次想唔想食、想食咩口味先⋯⋯
哩章亦即係哩個TED講座：
https://www.ted.com/talks/al_vernacchio_sex_needs_a_new_metaphor_here_s_one
仲有以下章節
四、愛與關係：成為最真實嘅自己
五、性別迷思：幫助年青人跳出新舊性別定型
六、性取向：我哋愛嘅人
七、我有幾鍾意自己嘅身體？用嚟做咩好？
八、年青人、性、科技
