《Raising Children Compassionately: Parenting the Nonviolent Communication Way》（慈悲湊仔法：以非暴力溝通養育孩童），Marshall Rosenberg，2004
★★★★☆
用「非暴力溝通」湊小朋友，即係唔會用對與錯、好與壞去撻小朋友，而係同佢哋討論點樣先會滿足到大家嘅需要，如果唔滿足會有咩感受。同時，家長亦可以同小朋友分享，當小朋友做出某一啲行為，會令到家長有啲需要未被滿足，並有難受嘅感受。
同我而家上堂學幼兒教育嗰一套好似，都係反對獎罰，重視訓練小朋友權衡利弊律己待人。懲罰固然唔好，因為小朋友學唔到背後原則，而係為咗逃避懲罰而唔去做某事，暗示緊嘅係，只要冇咗懲罰，就可以為所欲為。獎賞一樣唔應該使用，因為同懲罰一樣，背後係假設家長有更高權力，唔鼓勵小朋友用腦筋去考慮每一個行為。而所謂嘅乖同曳，唔應該同家長對小朋友嘅愛連上關係，家長對小朋友嘅愛應該係無條件嘅。
作者仲會同小朋友玩一個遊戲，叫做「隊長遊戲」，作者會將一啲平時由家長決定嘅事，交俾小朋友（隊長）決定，訓練小朋友自己做決策嘅能力。唯一需要強制嘅時候係當小朋友做出危害安全嘅行為，而且當刻唔夠時間好好溝通。
要慈悲地教養小朋友係好難嘅，一來我哋一般都唔係咁樣成長，所以首先要忘記自己細個所習慣嘅一套，好有意圖咁樣去學習、習慣新一套溝通模式。二來，咁樣教仔，好可能會遭到三姑六婆質疑，誤會你係縱容小朋友。要搵支持你嘅社群，都認同慈悲湊仔法，當你自己嘅需要越被滿足，你就越有能耐對小朋友慈悲。
