《Escape》（逃離），Carolyn Jessop with Laura Palmer，2007
★★★★☆
《Triumph: Life After the Cult — A Survivor’s Lessons》（勝利：邪教後的生活 — — 倖存者的得著），Carolyn Jessop with Laura Palmer，2010
★★★★☆
喺Netflix睇咗套紀錄片叫《Keep Sweet：Pray and Obey／聽話的孩子：邪教的禱告與服從》，係講基要派摩門教（FLDS）社群，好痴線。話說當摩門教放棄一夫多妻制，基要派就分裂咗出嚟，組成宗教主導極權封閉社群。自從Warren Jeffs成為教派領袖，就更加極權同變態。佢起碼有78個老婆，當中有啲係佢已逝世父親嘅妻子，另外有啲未成年。由於啲權貴要有幾十個老婆，唔夠女人分，幾乎冇讀過書嘅少男會被趕出社群。最痴線嘅係，即使Warren Jeffs已判終生監禁，但佢依然喺獄中管理社群，而信徒就覺得佢有如耶穌遭受迫害。
睇完紀錄片，又搵咗逃離咗嘅前教徒Carolyn Jessop寫嘅書。
《Escape》主要係講佢喺教內嘅生活，佢被父母安排嫁人，成為佢老公嘅第四妻子，同仔女一齊過住飽受虐待嘅生活。然後再講佢竟然成功帶晒八個仔女逃走，並贏得撫養權。
《Triumph》頭半本講政府衝入社群救咗幾百個小朋友出嚟，然後又因為養唔掂咁多小朋友，並且因為教派好成功嘅公關戰，放翻晒啲小朋友返去；後半本講翻作者哪來的勇氣同力量成功逃離 — — 我記得嘅有讀書、聽收音機、做gym、跑步，後三者都係偷偷地做嘅。
作者嘅文筆同埋敘事唔算特別好睇（畢竟佢成長以嚟都冇乜機會同外界接觸），但stranger than fiction嘅真人真事令人完全忍唔住追讀～
