《How to Manage Your Home Without Losing Your Mind: Dealing with Your House’s Dirty Little Secrets》，Dana K. White，2016
★★★☆☆
作者原本匿名寫網誌紀錄自己執屋，網誌題為《A Slob Comes Clean》（邋遢懶鬼變乾淨）。本書開宗名義話，如果你本身已經好企理，唔明點解有人明知有碗未洗都安然瞓得著，咁你放低本書啦；但如果唔知點解間屋成日都打完風咁，見到其他人持家有道就感到空虛寂寞凍，你搵到朋友喇。佢話，市面上大部份嘅整理秘笈，都係本身就好企理嘅人寫嘅，我哋同佢哋個腦唔同㗎。
的確稱唔上教人點執屋，其實成本書係重重覆覆鼓勵人執屋嘅打氣說話。雖然近年終於算係執正咗間屋，但骨子裏嘅邋遢懶鬼底都令我一路睇一路覺得「哩啲書、哩啲故事，雖然講唔出咩野大道理，但係我睇完之後覺得非常之有親切感！」
“Not all idealists are slobs, but most slobs are idealists.”
“Methods don’t clean your house. You have to clean your house.”
“Even worse, when I find a way that seems to work, it eventually stops working. Or I stop working.”
其實唔使特別搵啲咩方法，執屋最緊要嘅，係去執。同埋繼續執。
Slob Vision
「懶鬼視覺」淨係睇得見啱啱執完嘅最整齊嘅狀態、打完風咁嘅災難狀態，中間係睇唔到嘅。每次執完望落好高興，但隔幾日就見到「忽然」亂晒。究竟中間幾日發生咗咩事？就係冇事發生 — — 冇執屋囉。
Cleaning Intuition
有「清潔直覺」嘅人，知道幾時要做家務。作者自問冇呢，就定立咗每日／逢星期幾做咩家務，佢叫哩啲做pre-made decisions，因為 “If I let myself make the decision, I’m almost always wrong.”
Clutter Threshold
每個人嘅「雜物臨界點」都唔同，的確有人可以成屋收藏品，美輪美奐咁陳列擺設。但「雜物臨界點」低嘅人，一多嘢就會亂晒大籠，扔／捐咁啲嘢啦。
Container Concept
你間屋／櫃／架就係你嘅容器，擺唔落就要揀嘢扔／捐（One-In-One-Out Rule），而唔係買多啲容器返嚟。哩點只適合本身已經好多嘢、好多容器嘅人。喺我早前嘅執屋大計，買咗實用空間高、容易存取嘅積木床，買咗啲有門嘅櫃，效果好好。
Decluttering Questions
清雜物只需要問兩條問題：
1. 如果我想搵哩樣嘢，第一時間會去邊搵？而家即刻拎去嗰度。唔好諗過個更適合嘅儲存地方，因為用得著時會搵唔到。唔好疊起一堆先，等執完一次過拎過去，因為萬一中途被打斷會仲亂過未執之前。
2. 如果我需要搵哩樣嘢，我會唔會記得我已經有一件？唔會嘅話，扔／捐咗佢，因為即使而家擺起咗，結果都會以為自己冇而再買多件。
Daily 5-minute Pickup
哩個係最幫到我嘅建議 — — 每日執屋五分鐘。自問大部份空間都打理得唔太差，唯獨係我張枱（有時加埋我間房地下），總係「唔知點解」就「忽然」亂咗。到我發現亂咗時，已經係一座小山，一諗起要愚公移山就深感壓力，於是就拖字訣。每日五分鐘精髓在於冇乜壓力，第一日只係扔緊面層垃圾，冇乜決定要做；然後只要繼續冇乜壓力咁執多幾日，乾淨嘅枱面就「神奇地」出現咗喇～
最後順帶一提，哩本書嘅繁中譯本叫《懶惰主婦持家術》。容我借用網友嘅句式 — — 係有啲粗鄙，亦唔符合形而上前進人士嘅性別觀，但勝在言簡意賅 — — 唔通中文讀者係用個西嚟執屋嘅？
